०२६ वैशाख २२ गते कास्कीको भरत पोखरी गाविस जमुनाबोटमा आमा लक्ष्मी अधिकारी र पिता इन्द्रप्रसाद अधिकारीका जेष्ठ छोरा हुनुहुन्छ–रवीन्द्र अधिकारी । सानै उमेरदेखि राजनीतिक गतिविधिमा चासो राख्ने अधिकारी विद्यालयमा अनेरास्ववियु, रेडक्रस, र क्लबहरूमा सम्लग्नहुँदै संघीय पर्यटन मन्त्री हुनुभयो ।  

विद्यार्थीका लागि निःशुल्क कोचिङ कक्षा, पुस्तकालय, सरसफाइ, खेलकुद, सांस्कृतिक कार्यक्रम, नाटक, प्रहसन र गाडीमा विद्यार्थीका लागि सहुलियतलगायतका मध्यमबाट राजनीतिक जागरण सृजना फैलाउँदै राजनीति गर्नुभएको उहाँ २०४४ सालमा अनेरास्ववियु पृथ्वीनारायण क्याम्पस कमिटीको अध्यक्ष हुनुभयो ।

२०४५ सालमा स्ववियु पृथ्वीनारायण क्याम्पस सदस्य, २०४५ सालमा नै अनेरास्ववियु कास्की जिल्ला कमिटी अध्यक्ष, २०४७ सालमा गण्डकी अञ्चल अध्यक्ष तथा अनेरास्ववियु केन्द्रीय सदस्य बन्नुभयो । २०४९ सालमा पृथ्वीनारायण क्याम्पस पोखरा र २०५३ सालमा त्रिभुवन विश्वविद्यालय केन्द्रीय क्याम्पस कीर्तिपुरमा स्ववियु सभापति बन्नुभएको थियो । २०५६ सालमा अनेरास्ववियुका केन्द्रीय अध्यक्ष बन्नुभयो । ०५३ सालमा स्ववियु काउन्सिल नेपालका संयोजक निर्वाचितसमेत हुनुभयो । पञ्चायतकलामा विद्यार्थी आन्दोलन स्वतन्त्रता, प्रजातन्त्र, प्राज्ञिक स्वतन्त्रताको पक्षमा क्रियाशील उहाँ प्रजातन्त्रका लागी संघर्ष गर्दा पटक–पटक गरी ६ महिना जेल र हिरासतमा बताउनुभयो । 

२०४५ सालमा पार्टीको संगठित सदस्यता प्राप्त गर्नु भएका अधिकारी २०३९ सालमा पार्टीको रेडगार्ड अर्गनाइजेसनमा संगठित हुनु भएको थियो । २०४० मा इलाका पार्टी कमिटीमा, २०४६/४७ मा पोखरा नगर कमिटी र २०४८ मा पार्टी जिल्ला कमिटीमा र त्यस पछि लगातार जिल्ला कमिटीमा सक्रिय हुनुभयो । एमाले कास्कीको २०६० मा भएको छँटौं जिल्ला अधिवेशनले अधिकारी सचिवमा निर्वाचित हुनुभयो र ०६३ भएको सातौं जिल्ला अधिवेशनले पुन सचिवमा निर्वाचित हुनुभयो । 

२०६४ र २०७० सालको संविधानसभा सदस्यमा प्रत्यक्षतर्फ कास्की क्षेत्र नम्बर ३ बाट निर्वाचित हुनुभयो । ०७० मा संसदको विकास समितिमा सभापति हुनुभएको उहाँले त्यसबेला नेपालमा विकासको बहसलाई नयाँ उचाइ दिन सफल व्यक्तिका रुपमा चिनिनुहुन्थ्यो । विकास समितिको सभापति हुँदा अधिकारीले राष्ट्रिय गौरवका योजनाहरु र अन्य विकास निर्माणका योजनालाई सफल बनाउन क्रियाशिल रहनुभएको थियो । 

२०७४ सालको संघीय संसदमा कास्की क्षेत्र नम्बर २ बाट निर्वाचित हुनुभएको उहाँ तेस्रो पटक संसदमा ह्याट्रिक गर्दै निर्वाचित हुनुभयो ।  संसद यात्रासँगै उहाँ नेपाल सरकारको संस्कृति पर्यटन तथा नागरिक उडड्यन मन्त्री बन्नुभएको थियो । पर्यटनमन्त्री हुँदै गर्दा ०७५ साल १५ फागुनमा ताप्लेजुङमा हेलिकोप्टर दुर्घटनामा अधिकारी दिवंगत हुनुभयो ।